റോബോടാക്സി യാത്ര 4 മില്യൺ കിലോമീറ്റർ പിന്നിട്ടു; ദുബായിൽ സ്വയം-നിയന്ത്രിത ഗതാഗത സംവിധാനം പുരോഗമിക്കുന്നു

2030-ഓടെ ദുബായിലെ ആകെ ഗതാഗത യാത്രകളിൽ 25 ശതമാനവും സ്വയം-നിയന്ത്രിത സംവിധാനങ്ങൾ വഴിയാക്കുക എന്നതാണ് ലക്‌ഷ്യം

ദുബായ് സ്വയം-നിയന്ത്രിത ഗതാഗത  സംവിധാനങ്ങളിലേക്കുള്ള ചുവടുവയ്പ്പ് വേഗത്തിലാക്കുന്നു.  ഇതിന്റെ ഭാഗമായി,  റോബോടാക്സി പദ്ധതി  പ്രവർത്തനം തുടങ്ങിയതുമുതൽ 4 മില്യൺ  കിലോമീറ്ററിലധികം ദൂരം പിന്നിടുകയും 7,613 യാത്രാ സർവീസുകൾ പൂർത്തിയാക്കുകയും ചെയ്തു.

 ഈ സേവനത്തിൽ 144 വാഹനങ്ങളുണ്ട് . നിലവിൽ 48 വാഹനങ്ങൾ സജീവമായി പ്രവർത്തിക്കുന്നുണ്ട്.  ഓരോ വാഹനവും  ദിവസവും ശരാശരി 50 ട്രിപ്പുകൾ പൂർത്തിയാക്കുന്നു. ഉപഭോക്തൃ സംതൃപ്തി 97 ശതമാനം എന്ന മികച്ച നിലവാരത്തിലെത്തി. ഡ്രൈവറില്ലാ ഗതാഗത സംവിധാനത്തിലുള്ള പൊതുജനങ്ങളുടെ വർധിച്ചുവരുന്ന വിശ്വാസത്തെയാണ് ഇത് ചൂണ്ടിക്കാണിക്കുന്നത്. 

2030-ഓടെ ദുബായിലെ ആകെ ഗതാഗത യാത്രകളിൽ 25 ശതമാനവും സ്വയം-നിയന്ത്രിത സംവിധാനങ്ങൾ വഴിയാക്കുക എന്ന തന്ത്രപ്രധാനമായ ലക്ഷ്യം കൈവരിക്കാൻ ഈ നേട്ടം സഹായിക്കുമെന്ന് കോർപ്പറേറ്റ് ടെക്നോളജി സപ്പോർട്ട് സർവീസസ് സെക്ടർ സിഇഒയും ഓട്ടോണമസ് ട്രാൻസ്‌പോർട്ട് ആൻഡ് ഏരിയൽ ടാക്സി കമ്മിറ്റി ചെയർമാനുമായ അഹമ്മദ് ബഹ്‌റോസ്യൻ പറഞ്ഞു.